【明報專訊】《明報》舉辦首屆卓越財經大獎，結果噚日揭盅，有17家金融機構攞獎（見表）。小琴噚日去灣仔君悅酒店睇頒獎，得獎機構代表都話，喺疫情下可以出席實體頒獎禮，亦可以同其他代表交流互相認識，實在難得。
得獎機構：出席實體頒獎禮機會難得
講番卓越財經大獎，主要表揚財經服務企業及機構建立品牌價值，善用創新科技，提升客戶體驗、推出嶄新服務及產品，洞悉本地以至大灣區新機遇，同時能平衡環境、社會及管治所需，發揮正面積極嘅社會影響力，為財經服務創造更高價值，開拓更廣闊的空間。評審團成員包括經濟學者、專業領袖、社會賢達合共16人，支持今次活動嘅機構有15家。今屆頒發獎項有24個，10家銀行、5家保險公司、1家電子支付服務商、1家網上投資平台服務商攞獎。
財經事務及庫務局副局長陳浩濂致詞時話，頒獎禮設有唔同範疇獎項，有傳統嘅金融服務，有不斷創新嘅數碼平台服務，同埋為業界帶嚟新機遇嘅大灣區金融服務，獎項嘅唔同種類正正體現到香港金融業嘅多元化發展，同埋百花齊放嘅繁榮景象。小琴希望，得獎嘅機構可以再接再厲，幫手令本地嘅客戶可以享有更優質、更方便嘅服務。
